ცხვირიდან სისხლდენა ბავშვებში

ცხვირიდან სისხლდენა პატარებში, მხოლოდ იშვიათ შემთხვევაშია სერიოზულ დაავადებაზე მიმანიშნებელი და უმეტესწილად საშიშროებას არ წარმოადგენს.

რა შეიძლება იყოს ცხვირიდან სისხლდენის მიზეზი?

• მშრალი ჰაერი ზამთრის პერიოდში, ოთახში არსებული გათბობის სისტემა იწვევს ჰაერის გამოშრობას, რაც თავისთავად იწვევს ცხვირის ლორწოვანი გარსის გამოშრობას. ის ხდება მგრძნობიარე და ადვილად გაღიზიანებადი. შესაბამისად, სისხლდენაც მარტივად წარმოიქმნება. ჰაერის გამოშრობის თავიდან ასაცილებლად, რეკომენდებულია წყლიანი თასის დადება გათბობასთან ახლოს, ან სპრეი, რომელიც ზღვის მარილის ბაზაზეა შექმნილი.

• მწვავე დაავადებებისას ცხვირის პოლიპების, სინუსიტის ან უბრალო გაციება თანდართული სურდოთი ცხვირიდან სისხლდენის რისკს წარმოადგენს.

• სისხლძარღვთა დაზიანება ბავშვების ცხვირის კაპილარების სისუსტის გამო, ხშირად ხდება მათი დაზიანება ცხვირის მოწმენდისას ან მექანიკური დაზიანებისას.

შედარებით იშვიათ შემთხვევაში სისხლდენის მიზეზი შეიძლება იყოს: ინფექციები, სიმსივნეები, ღვიძლის დაზიანება, ჰემოფილია, სისხლის მაღალი წნევა, ვიტამინების ნაკლებობა, სისხლძარღვთა დაავადებები.

როგორ მოვიქცეთ ცხვირიდან სისხლდენისას?

რთულია, როცა სისხლიან შვილს დავინახავთ, ემოციები შევიკავოთ, თუმცა მნიშვნელოვანია, რადგან ისედაც შეშინებული ბავშვი, უფრო მეტად არ შევაშინოთ. დავადოთ სველი, ცივი პირსახოცი კისრის უკანა მხარეს (ზურგის ზემოთ), რაც ხელს უწყობს სისხლდენის შეჩერებას.

მთავარია, ბავშვს თავი უკან არ გადავაწევინოთ, რომ სისხლი არ გადაყლაპოს. სისხლის  გადაყლაპვამ, შესაძლოა, სისუსტე და ღებინება გამოიწვიოს.

იმისათვის, რომ სისხლი სასუნთქ გზებში არ მოხვდეს, ვთხოვოთ ბავშვს, ისუნთქოს პირით. ცხვირის ნესტო კი თითით ან ცხვირსახოცით დავუხშოთ (დავაწვეთ თითით ცხვირის ფრთას).

შედარებით ძლიერი სისხლდენისას შესაძლოა ცვირის ნესტოში დოლბანდის მოთავსება.

თუ სისხლდენა 5 წუთზე მეტხანს გაგრძელდა, აუცილებლად უნდა მივმართოთ ექიმს!