როგორ მოვიქცეთ, თუ ბავშვი ბულინგის მსხვერპლია?

ბულინგი გულისხმობს ადამიანის მიერ ძალის, მუქარის გამოყენებას სხვაზე დომინირების, შეურაცხყოფის, დაშინების მიზნით. იგი შეიძლება მოიცავდეს ცემას, ხელის კვრას, სხვადასხვა სახელის დაძახებას, დაცინვას, ჭორების გავრცელებას, ფულის გამოძალვას და ა.შ

უნდა გვახსოვდეს, რომ ბავშვებს შორის უწყინარი გახუმრება, რაც ხშირად ხდება და სავსებით ნორმალურია, მკვეთრად განსხვავდება ბულინგისგან, რომელიც აუცილებლად საჭიროებს ჩარევას, რადგან  შეიძლება დიდ ტრაგედიამდე მიგვიყვანოს

ხშირად ბულინგის მსხვერპლი ფსიქოლოგიურად და ფიზიკურად სუსტი ადამიანია, ან ადამიანი რომელიც რაიმე ნიშნით განსხვავებულია, თუმცა ეს ყოველთვის ასე არ არის

მნიშვნელოვანია იმ ფაქტის აღნიშვნა, რომ ბულინგის მსხვერპლი ბავშვები ხშირად არ საუბრობენ თავიანთ მდგომარეობაზე. მიზეზი სხვადასხვაა: მათ რცხვენიათ, ეშინიათ მშობლების რეაქციის, თვლიან რომ ისინი უსაყვედურებენ ან ვერ გაუგებენ. ფიქრობენ იმასაც, რომ ყველაფერი მათი ბრალია და სხვანაირად უნდა მოქცეულიყვნენ. მათ ასევე ეშინიათ მოძალადის რეაქციის, როცა გაიგებს რომ მან ვინმეს შეატყობინა ამ ამბის შესახებ

სწორედ ამიტომ, საკმაოდ რთულია იმის შემჩნევა არის თუ არა თქვენი შვილი ბულინგის მსხვერპლი, მაგრამ არსებობს ზოგადი, ე.წ გამაფრთხილებელი ნიშნები:

თქვენ შეიძლება შენიშნოთ, რომ ბავშვი სხვანაირად იქცევა, უფრო გაღიზიანებულია, არ ჭამს, არ ძინავს კარგად, არ უნდა გააკეთოს ის, რასაც ადრე სიამოვნებით აკეთებდა ან თავს არიდებს იმ სიტუაციებს, რაც ადრე არ აწუხებდა

ბულინგი საკმაოდ ფართე ცნებაა და ყველა შემთხვევას ერთნაირად ვერ მივუდგებით. მნიშვნელოვანია ამ პროცესში მასწავლებლების, ფსიქოლოგების, დირექტორის და ყველა იმ ადამიანის ჩართვა, რომლებიც დღის განმავლობაში ყურადღებას აქცევენ ბავშვებს. ხანდახან სწორი გადაწყვეტილება მჩაგვრელის მშობლებთან კონტაქტია

ზოგი მშობლისთვის ერთადერთი გამოსავალი ბულინგზე ბულინგით პასუხია, რაც ხშირად საკმაოდ ცუდი შედეგით სრულდება.

უმჯობესია მაშინ, როცა ბავშვთან პირისპირ აღმოჩნდებით, არ დაივიწყოთ ის ფაქტი, რომ მას დიდი ძალისხმევა დასჭირდა სანამ თქვენამდე მოვიდოდა და ყველაფერს გიამბობდათ, ამიტომ პირველ რიგში შეაქეთ გულახდილობისთვის, შეახსენეთ რომ მარტო არ არის, ხაზი გაუსვით იმ ფაქტს, რომ მოცემულ სიტუაციაში არასწორი მხოლოდ მჩაგვრელია და არა ის

ჰკითხეთ, თუ როგორ აპირებს ამ სიტუაციის გამოსწორებას. ეს დაარწმუნებს მას, რომ თქვენ მისი გადაწყვეტილების გჯერათ

არ მოაგვაროთ მისი პრობლემები მის მაგივრად. ის თვითონ უნდა გაუმკლავდეს მას. გახსოვდეთ, რომ თქვენი მოვალეობა მხოლოდ შვილის დახმარება და მხარდაჭერაა.

თუ ეს შესაძლებელია, ურჩიეთ თავი აარიდოს ისეთ სიტუაციებს და ისეთ ადამიანებთან კონტაქტს, რომლებიც ჩაგრავენ

წაახალისეთ ის მეტი დრო გაატაროს იმ მეგობრებთან ერთად, რომლებსაც კარგი გავლენა აქვს მასზე და მიიღოს მონაწილეობა მათთან ერთად სხვადასხვა აქტივობებში