ბრონქიტი ბავშვებში

რა არის ბრონქიტი?

ბრონქიტი არის ბრონქიალური მილების (მსხვილი სასუნთქი გზების) ინფექცია ან ანთება. როდესაც ბავშვი არის გაციებული, სტკივა ყელი, აქვს გრიპი, იგივე ვირუსი შეიძლება გავრცელდეს ბრონქიალური მილებისკენ. ამის შედეგად კი ხდება სასუნთქი გზების შეშუპება, ანთება და ნაწილობრივი დაცობა ლორწოთი.

ვირუსული ინფექცია არის ყველაზე ხშირი გამომწვევი ბავშვებში, თუმცა, ბაქტერიულმა ინფექციებმა და გამღიზიანებლებმა, როგორებიცაა სიგარეტის კვამლი, ბოლი და მტვერი, შესაძლოა ასევე მოგვცეს ბრონქიტი.

ბრონქიტი ბავშვებში

თავიდან ბავშვს შეიძლება ჰქონდეს გაციების სიმპტომები – ყელის ტკივილი, დაღლილობა, გამონადენი ცხვირიდან, დაბალი სიცხე. გარდა ამისა:

• ხველა, რომელიც იწყება მშრალი სახით, შემდგომ კი ხველასთან ერთად გამოიყოფა მოყვითალო-მომწვანო ლორწო
• ხველის დროს გულისრევის შეგრძნება ან ღებინება
• მოჭერის შეგრძნება გულმკერდის არეში
• სუნთქვის უკმარისობა
• თავის ტკივილი

ბრონქიტის დიაგნოსტიკა

ექიმი მოუსმენს თქვენი ბავშვის ფილტვებს სტეტოსკოპით, ჩაუტარებს პულს ოქსიმეტრიას – ამ დროს ბავშვის თითზე მაგრდება პატარა აპარატი, რომელიც ზომავს სისხლში ჟანგბადის დონეს. ასევე, საჭირო იქნება ფილტვის რენტგენოგრამა იმისთვის, რომ გამოირიცხოს პნეუმონია (ფილტვების ანთება). ასევე, შეიძლება ჩატარდეს სხვადსხვა სუნთქვის ტესტები ასთმის გამოსარიცხად.

ბრონქიტის მკურნალობა

უმეტეს შემთხვევაში ექიმები არ დანიშნავენ წამლებს. ისინი მოგცემენ რამდენიმე რჩევას როგორ გააუმჯობესოთ ბავშვის მდგომარეობა. წამლებს, განსაკუთრებით ანტიბიოტიკებს არანაირი შედეგი არ აქვს! რადგან ბრონქიტის გამომწვევი არის ვირუსი.

იმ შემთხვევაში, თუ ბავშვს უჭირს სუნთქვა და აქვს დისკომფორტი, ექიმი დაგინიშნავთ საინჰალაციო ბრონქოდილატატორს – სასუნთქი გზების გამაფართოებელი მედიკამენტს, რომელიც კეთდება ინჰალაციით.

თუ ფიზიკური გამოკვლევით ან ანალიზებით გამოვლინდება ბაქტერიული ბრონქიტი, პნეუმონია ან სხვა ბაქტერიული ინფექცია, მხოლოდ  ამ შემთხვევაში დაგინიშნავთ ექიმი ანტიბიოტიკს.