ბავშვის ოფლიანობა ძილის დროს

ბავშვებში ღამის ოფლიანობა საკმაოდ ხშირია და უმეტესწილად საგანგაშო არ არის. მათ ძირითადად უოფლიანდებათ ხელის მტევნები, ტერფები, იღლია, სახე და თავი.

ძილის დროს ოფლიანობის მიზეზი შეიძლება იყოს:

• გარე ფაქტორები – ოთახის მაღალი ტემპერატურა, დახურული ფანჯრები
• ზედმეტად თბილი თეთრეული და ღამის სამოსი
• უსიამოვნო სიზმრები
• სუნთქვის პრობლემები
• ხვრინვა
• ტემპერატურის სწრაფი ცვალებადობა დაკავშირებული კონდიციონერთან
• სტრესი, გაღიზიანება
• ვირუსული, ბაქტერიული ინფექციები
• ჰიპერთირეოიდიზმი-ამ დროს ღამის ოფლიანობა შერწყმულია წონის კლებასთან, დაღლილობასთან, გულის აჩქარებასთან და საჭიროებს ენდოკრინოლოგის კონსულტაციას
• ჰიპოგლიკემია
• რაქიტი

გარდა ამ მიზეზებისა, იშვიათად ბავშვებში ღამის ოფლიანობა შეიძლება დაკავშირებული იყოს ასთმასთან, ბლასტომიკოზთან, ენდოკარდიტთან, ლეიკემისთან, ლიმფომასთან, ტუბერკულოზთან. არ შეგეშინდეთ და  გაითვალისწინეთ, რომ ამ შემთხვევებში ბავშვს სხვა სიმპტომებიც ექნება.

როგორც აღვნიშნე, ღამის ოფლიანობა უმეტესწილად გარე ფაქტორებთან არის დაკავშირებული და მას რაიმე სერიოზული მიზეზი არ აქვს. იგი ჩვეულებრივ გაივლის ბავშვის ზრდასთან ერთად.  ქვემოთ ჩამოთვლილია გარკვეული რეკომენდაციები

• შეუქმენით თქვენს შვილს ისეთი გარემო, რომ მშვიდად დაიძინოს
• გააკონტროლეთ რომ ძილის წინ არ მიიღოს კოფეინი, ცხარე საკვები
• ჩააცვით მსუბუქად და შეინარჩუნეთ ოთახის ოპტიმალური ტემპერატურა
• თუ თვლით რომ ოფლიანობა რაიმე მედიკამენტის ბრალია, დაელაპარაკეთ ექიმს
• გაარკვიეთ ხომ არ აქვს რაიმე პრობლემა, რაც მის გაღიზიანებას და შფოთვას იწვევს

იმ შემთხვევაში, თუ ჩათვლით რომ ღამის ოფლიანობა ზედმეტად დიდხანს გრძელდება, აწუხებს თვითონ ბავშვს და ზემოთ ჩამოთვლილმა მეთოდებმა შედეგი არ გამოიღო გაიარეთ კონსულტაცია ექიმთან