რა კავშირია ასპირინსა და რეიეს სინდრომს შორის ?

რა არის რეიეს სინდრომი და როგორ ვლინდება ის?

რეიეს სინდრომი იშვიათი, მაგრამ საკმაოდ სერიოზული მდგომარეობაა, რომელიც იწვევს ღვიძლის და თავის ტვინის დაზიანებას. იგი ძირითადად გვხვდება ბავშვებსა და თინეიჯერებში გრიპის და ჩუტყვავილას გადატანის შემდეგ.

რეიეს სინდრომის გამომწვევი ზუსტი მიზეზი ცნობილი არ არის, თუმცა ყველაზე ხშირად გვხვდება ცხიმოვანი მჟავების მეტაბოლიზმის დარღვევის მქონე პირებში, რომლებმაც მიიღეს ასპირინი ზემოთ ჩამოთვლილი ვირუსული ინფექციების დროს. სისხლში ქვეითდება გლუკოზის რაოდენობა, იმატებს ამიაკის და სხვა ტოქსინების დონე, რაც იწვევს ღვიძლის დაზიანებას და თავის ტვინის შეშუპებას, მის დისფუნქციას და საბოლოოდ სიკვდილს.

ზოგ შემთხვევაში ეს სინდრომი შეიძლება გამოიწვიოს ადამიანის კავშირმა ინსექტიციდებთან, ჰერბიციდებთან, საღებავის გამათხელებლებთან.

2 წლამდე ასაკის ბავშვებში რეიეს სინდრომი იწყება დიარეით და სუნთქვის აჩქარებით. უფრო მოზრდილ ბავშვებსა და თინეიჯერებში, კი ვლინდება ღებინებით და ლეთარგიით (მდგომარეობა რომელიც გავს ღრმა ძილს და ხასიათდება უმოქმედობით და გარე გამღიზიანებლებზე რეაქციის უქონლობით).

მდგომარეობის პროგრესირებასთან ერთად სიმპტომებიც უფრო სერიოზული ხდება, ესენია:

• გაღიზიანება, აგრესიულობა ირაციონალური ქცევები
• დაბნეულობა, დეზორიენტაცია, ჰალუცინაციები
• კიდურების სისუსტე და პარალიზი
• გულყრა
• ცნობიერების დაქვეითება

პრევენცია:

• იყავით ფრთხილად როცა იყენებთ ასპირინს და შეათანხმეთ ეს ექიმთან
• არ გამოიყენოთ ის განსაკუთრებით ვირუსული ინფექციების დროს
• იმ შემთხვევაში, თუ ზუსტად იცით რომ ბავშვს აქვს ცხიმოვანი მჟავების მეტაბოლიზმის დარღვევა არასდროს არ მისცეთ ასპირინის შემცველი პრეპარატები

გაითვალისწინეთ, რომ ასპირინი შესაძლოა შეგხვდეთ აცეტილსალიცილის მჟავას სახელწოდებით

რეიეს სინდრომის სადიაგნოსტიკო სპეციფიკური მეთოდი არ არსებობს. ექიმები მიმართავენ სისხლის და შარდის ტესტებს, ხოლო მსგავსი სიმპომებით მიმდინარე დაავადებებთან სადიფერენციოდ იყენებენ ლუმბალურ პუნქციას, ღვიძლის და კანის ბიოფსიას, კომპიუტერულ  ტომოგრაფიას.

რეიეს სინდრომის მკურნალობა გულისხმობს საავადმყოფოში ინტრავენურად გლუკოზის და ელექტროლიტების გადასხმას, დიურეტიკების და სისხლდენის საწინააღმდეგო პრეპარატების მიღებას

რეიეს სინდრომი დროული დიაგნოსტიკის და სწორი მკურნალობის გარეშე ან ფატალურად, ან ტვინის სერიოზული დაზიანებით სრულდება