რა იწვევს ალერგიას შინაური ცხოველების მიმართ და როგორ მოვიქცეთ ამ შემთხვევაში?

იმუნური სისტემის  მთავარი ფუნქციაა ორგანიზმისთვის უცხო აგენტის გამოცნობა და ადექვატური საპასუხო რეაქციის განვითარება. შინაური ცხოველების მიმართ ალერგიულ ადამიანებს აღენიშნებათ ზემგრძნობელობა ცხოველების შარდში, ნერწყვში, კანის მკვდარ უჯრედებში არსებული ცილის მიმართ, რომელსაც იმუნური სისტემა აღიქვამს როგორც უცხოს და იწყებს მასთან ბრძოლას. გარდა ამ ცილისა, ცხოველის თმაზე შეიძლება მოხვდეს ისეთი ალერგენები, როგორიცაა ოთახის და ყვავილის მტვერი.

ცნობილია, რომ კატების მიმართ ალერგია ორჯერ უფრო ხშირია, ვიდრე ძაღლების მიმართ.

სიმპტომები მოიცავს:

• თვალის ცრემლიანობას
• ცემინებას და ცხვირიდან გამონადენს
• სუნთქვის გაძნელებას
• გამონაყარს კანზე
• ქავილს

სანამ სახლში შინაურ ცხოველს მოვიყვანთ უნდა დავრწმუნდეთ, რომ ბავშვს არ აქვს ალერგია მათ მიმართ. განსაკუთრებით იმ ოჯახში სადაც, რომელიმე წევრი ალერგიულია, იზრდება ალერგიის განვითარების რისკი. ზემოთ ჩამოთვლილი სიმპტომები, აგრეთვე კანის და სისხლის ტესტის შედეგები, საშუალებას აძლევს ალერგოლოგს დაადგინოს, აქვს თუ არა ბავშვს ალერგია ცხოველების მიმართ.

ალერგიის დადასტურების შემთხვევაში, შემდეგი ნაბიჯია ცხოველის სწორად შერჩევა.

არჩევანი შეიძლება გაკეთდეს ტროპიკულ თევზსა და ქვეწარმავლებზე.  რაც შეეხება ზაზუნას, ის რეკომენდებულია მაშინ, როცა ალერგია არ არის ძლიერ გამოხატული.

არსებობს თუ არა “ჰიპოალერგიული” კატა და ძაღლი?

“ჰიპოალერგიული” კატა და ძაღლი არ არსებობს.  2011 წელს  ჩატარებული კვლევის შედეგი (შეგიძლიათ იხილოთ აქ ) გვიჩვენებს, რომ ალერგენის დონე იმ სახლებში, სადაც “ჰიპოალერგიული” ჯიშის ძაღლები იყვნენ არ განსხვავდებოდა იმ სახლებში არსებული დონისგან, სადაც “არაჰიპოალერგიული” ძაღლები იმყოფებოდნენ.

სამწუხაროდ, ალერგიისგან თავის დაღწევის საუკეთესო გზა სახლიდან ცხოველის მოშორებაა, თუმცა იმ შემთხვევაში, თუ მაინც გადაწყვეტთ რომ დაიტოვოთ ცხოველი, ან მასთან კონტაქტი ბავშვს მაინც უხდება აუცილებელია დაიცვათ შემდეგი წესები:

• ცხოველი უნდა იმყოფებოდეს ბავშვის ოთახიდან მოშორებით, უმჯობესია გარეთ
• უნდა აიკრძალოს მასთან ჩახუტება
• უნდა დაბანოთ ცხოველი ყოველ კვირას და დავარცხნოთ
• გაწმინდოთ სახლი ყოველდღიურად
• დააყენოთ ჰაერის გამწმენდი საშუალება