7 რჩევა, როგორ გავხადოთ შვილისთვის წიგნის კითხვა უფრო საინტერესო

დარწმუნებული ვარ, ძალიან კარგად იცი, როგორ ეხმარება კითხვა ბავშვის გონებრივ განვითარებას. ამიტომ, გიზიარებ რამდენიმე მარტივ რჩევას, თუ როგორ გავხადოთ კითხვის პროცესი ჩვენი შვილებისთვის უფრო საინტერესო:


  1. მოარგე პერსონაჟის როლი

პერსონაჟების როლების მორგება კითხვის პროცესს ბევრად უფრო საინტერესოს და ინტერაქციულს ხდის. “შენიამ” უკვე ნახევრად გააკეთა ეს საქმე, რადგან ჩვენს წიგნებში ბავშვები თავად არიან პერსონაჟები. ისღა დაგრჩენია, შენც გაახმოვანო დიალოგები, ან თუნდაც გარდერობიდან ტანსაცმელი შეუსაბამო წიგნს, რომელსაც ერთად კითხულობთ.


2. ილაპარაკე წიგნის წაკითხულ ნაწილზე

ბავშვებისთვისაც ძალიან მნიშვნელოვანია, რომ წაკითხულზე ესაუბრო, ჰკითხო აზრი იმ თავზე, რომელიც წინა ღამით ჩაამთავრეთ, ან ახალ პერსონაჟზე, რომელიც წიგნში გამოჩნდა ან იმაზე, როგორ შეიძლება გაგრძელდეს ამბავი. ელაპარაკე წიგნზე ჭამის, ბანაობის, იატაკზე კოტრიალის, სახლის დალაგების თუ სხვა, ნებისმიერ დროს. 


3. ეთამაშე ახალი სიტყვებით

შვილისთვის წიგნის კითხვისას „რას ნიშნავს“ ალბათ ყველაზე პოპულარული შეკითხვაა, რომელსაც მისგან ისმენ. შენც გაქვს პასუხები, რომლებიც შეიძლება, მალე დაგავიწყდეს. თუმცა, თუ ყველა ასეთ სიტყვას მოინიშნავ და შიგადაშიგ ჰკითხავ ბავშვს - ახალი, საერთო თამაშიც გექნებათ - სიტყვების გახსენებობანა.


4. წაუკითხე მხოლოდ ის წიგნები, რომლებიც შენც მოგწონს

კითხვა არც იქნება საინტერესო, თუ ისეთ წიგნს შეარჩევ, რომელიც არ მოგწონს. ეს კი კითხვის მთელ პროცესს გააფუჭებს. სიმართლე გითხრა, მნიშვნელობა არ აქვს, შენთვის არის უსიამოვნო წიგნის კითხვა, თუ - შენი შვილისთვის. განწყობა აუცილებლად გადაედება რომელიმე თქვენგანს. ამიტომ, ერთად წასაკითხად კარგად შეარჩიე წიგნი.


5. წააკითხე სხვასაც

მჯერა, რომ საუკეთესო მკითხველი ხარ და ვერავინ შეგედრება! თუმცა, როცა საქმე ბავშვებს ეხებათ, მრავალფეროვნება აუცილებელია. ჩართე კითხვის პროცესში მამა, ბებია, ბაბუა, უფროსი და-ძმა ან სხვა ვინმე იმისთვის, რომ კითხვის პროცესი კიდევ უფრო გაახალისო. 




6. გააცოცხლე წაკითხული

ზღაპრები და ჯადოსნური ამბები მანამ არის საუკეთესო, სანამ გჯერა, რომ შენც შეგიძლია, გადაგხდეს. სინამდვილეში ძალიან მარტივია, რომ შენს შვილს მისი საყვარელი წიგნის გამოცდილება გაუზიარო. როგორ? შეღებე მესერი შვილთან ერთად, ისე, როგორც ღებავდა ტომი, ან „ამ ერთხელ“ მიეცი საშუალება მას, ქილიდანვე ამოტლიკოს მურაბა, ისევე, როგორც კარლსონმა. წვრილმანი მსგავსება წიგნთან დაეხმარება მას, რომ თავი ყველაზე კეთილი სამყაროების ნაწილად იგრძნოს და კიდევ უფრო მეტი ჯადოსნური სამყაროს გაცნობა მოუნდეს.


7. ერთად გააგრძელე წიგნი

მერწმუნე, ჯადოსნური ამბები არასდროს მთავრდება! მეტსაც გეტყვი, ბავშვებს ყოველთვის აინტერესებთ, რა ხდება ბოლო გვერდის შემდეგ - ისევ ტკბილად და ბედნიერად ცხოვრობენ? ისევ მეგობრობენ? ისევ ეხვევიან ხათაბალებში, როგორც ადრე? - ბევრი კითხვაა, რომლებსაც კიდევ უფრო ბევრი პასუხი აქვს. შვილთან ერთად მოიგონე წიგნის გაგრძელება დასასრულის შემდეგ, დაიწყე ახალი თავი და მოიფიქრეთ თქვენ-თქვენი ვერსიები კითხვაზე - მერე რა მოხდა? როგორ გაგრძელდა ამბავი?


ბლოგი მომზადებულია "შენია" გუნდის მიერ. “შენია” პერსონალური საბავშვო ზღაპრების ვებ-გვერდია. პერსონალურ წიგნებში ბავშვები თავად არიან მთავარი გმირები. წიგნის ფურცლებზე პატარა შეხვდება საკუთარ თავს - პერსონაჟს, რომელსაც მისი სახელი ჰქვია და მისივე მსგავსი გარეგნობითაა „შენიღბული“. მეტის სანახავად ეწვიეთ "შენიას" ვებ გვერდს www.shenia.com





ბლოგის ძებნა

გამოიწერეთ

მიიღე ახალი სტატიები ელ. ფოსტაზე