უსაფრთხო ბავშვობა – სახლში დამალული საფრთხეების არიდების მარტივი გზები

ბავშვის გაჩენას, დიდ სიხარულსა და ბედნიერებასთან ერთად, ახალი საზრუნავებიც შემოაქვს სახლში. უცბად ვხვდებით, რომ ორი თვალი და ორი ყური აღარაა საკმარისი და ასი თვალის დაჭყეტის, ასი ყურის დაცქვეტის, რვა ფეხისა და დამატებითი ხელების გამობმის აუცილებლობა ჩნდება. და რადგან ამის შესაძლებლობა არაა, საჭირო რჩევებს გაგიზიარებთ. ეს რეკომენდაციები დაგეხმარებათ, მარტივად მოუგრიხოთ კისერი სახლში ჩასაფრებულ ხიფათებს და არ დახარჯოთ თქვენი ძვირფასი ენერგია შფოთვა-პანიკასა და აღმა-დაღმა სირბილში.

მარტივი ჭეშმარიტებები

პირველი ექვსი თვის განმავლობაში ბავშვს აუცილებლად იმავე ოთახში უნდა ეძინოს, სადაც თქვენ წევხართ. ასე უკეთ შეძლებთ სიტუაციის კონტროლს და შესაძლო საფრთხეების აღმოფხვრას.

პირველ რიგში კარგად მიათვალიერ-მოათვალიერეთ ადგილი, სადაც საწოლი დგას. შეამოწმეთ, ხომ არაა ახლო-მახლო დენის ჩამრთველი? როზეტი? ელექტროგაყვანილობა? მოაშთეთ ყველანაირი კაბელი, ელექტროსადენი და მობილური ტელეფონი თავისი დამტენითურთ. მოაცილეთ იქაურობას კონწიალა სათამაშოები. შეიძლება მწოლიარე მდგომარეობაში ვერ ჩაებღაუჭოს, მაგრამ თუ დაჯდა, ან თუ წამოდგა, ხომ არ მისწვდება? დააძინეთ ბავშვი ზურგზე და ნუ ჩაფლავთ ბალიშებსა და საბნებში. მით უმეტეს, თავზე ნუ წამოახურავთ გადასაფარებელს. არ უნდა ეს ზედმეტი ფუთვა-ფუთვნა. საერთოდაც, რაც ნაკლები ნივთი ეყრება ბავშვის საწოლში, მით უკეთესი.

ნუ დადებთ წამლებსა და კოსმეტიკას ბავშვისთვის ხელმისაწვდომ ადგილას. ნუ დატოვებთ წვეტიან, ბასრ საგნებს. ნუ დაკიდებთ თაროებს, კარადებსა და ჩარჩოებს მაინცდამაინც ბავშვის საწოლის თავზე. რამე სხვა ადგილი შეურჩიეთ. რომც სციოდეს, არ ჩაუგოროთ ლოგინში ქაფქაფა წყლით სავსე სათბურები და არ გაახვიოთ ელექტროსაბნებში. არ გამოიყენოთ საწოვარას ტანსაცმელზე დასამაგრებლად ლენტები და ამდაგვარი გრძელი რამე-რუმეები. არ გაგიჟდეთ და თოკით არ გამოაბათ კისერზე! არ დააძინოთ წინსაფრით, ან იმგვარი ტანსაცმლით, რომელმაც კისერზე შეიძლება მოუჭიროს.   

ეს წესები მაშინაც უნდა დაიცვათ, როცა ბავშვს სხვა ოთახში გაასახლებთ.   

საბავშვო მონიტორი

საბავშვო მონიტორი გადასარევი გამოგონებაა იმისთვის, რომ ყოველ წუთას არ მოგიწიოთ ოთახიდან ოთახში სირბილი და იმის შემოწმება, ბავშვმა ხომ არ გაიღვიძა, ხომ არ ტირის, საბანი ხომ არ გადაიხადა, ძირს ხომ არ გაადინა ზღართანი და ა.შ.. არსებობს აუდიომონიტორებიც, მხოლოდ ხმა რომ ისმის და ვიდეომონიტორებიც – გამოსახულებაც რომ ჩანს. ცხადია, გამოსახულებიანი სჯობს. ბავშვი რომ ჩნდება, ათას უსარგებლო ნივთს ყიდულობს გახარებული მშობელი. ჩვენ თუ გვკითხავთ, მონიტორი განსაკუთრებით საჭირო და გამოსადეგი რამაა. თუ არჩევანია, სხვა რამეს შეელიოთ და ეს იყიდოთ, აჯობებს. 

ბანაობის ამბები

ბავშვებისთვის აბაზანაც სათამაშო სივრცეა, მაგრამ, აუცილებელია გვახსოვდეს, რომ წყალთან ბევრი ხიფათია დაკავშირებული. არა, გულს კი არ გიხეთქავთ, გაფრთხილებთ უბრალოდ. და ცოტა გულსაც გიხეთქავთ, რომ გაფრთხილდეთ. არც ერთი წუთით არ დატოვოთ პატარა უყურადღებოდ წყალში. თუნდაც რომ უმშვიდესი და უწყნარესი მოქალაქე იყოს. აბაზანაში გასრიალების საწინააღმდეგო საფენი ჩაუფინეთ. თუ უკვე დგება და ხვალცალიკობს, აბაზანის გადმოსასველთანაც დააგეთ.  

როცა ფოფხვას იწყებს

როცა ბავშვი დამოუკიდებლად იწყებს გადაადგილებას, დამატებითი საფრთხეები ჩნდება. ფაქტიურად ყოველ კუთხე-კუნჭულში რაღაც ჭინკაა ჩასაფრებული. თუ სახლში კიბე გაქვთ და თქვენი თავგადასავლების მაძიებელი შვილის ყოველ აბობღება-ჩამობობღებაზე გული გისკდებათ, კიბის ბარიერი შეგიძლიათ გამოიყენოთ. კიბე თუ არ გაქვთ, ოთახების გადასატიხრადაც გამოგადგებათ, მაგალითად, სამზარეულოში რომ არ შებოდიალდეს, სადაც საშიში და ავისმომასწავებელი ქვაბი თუხთუხებს.

როზეტებს რომ არ უჩხიკინოს, დამცავები დაუყენეთ. კარადებისა და მაგიდების კუთხეებს რომ არ ახალოს თავი, კუთხეების დამცავები დაამაგრეთ. ამდენი სხვადასხვაგვარი დამცავი სად იშოვოთ? არსებობს მშვენიერი კომპლექტები, სადაც ყველანაირი დამცავია თავმოყრილი, მაგალითად ეს

ყველაფერი, რაც იღება, პოტენციური მტერია

აუცილებლად დარწმუნდით, რომ ბავშვს არ აქვს ფანჯრის გაღების შესაძლებლობა. და საერთოდ, არაფერი დადგათ ფანჯარასთან ახლოს, რაც პატარას რაფაზე ასვლის საშუალებას მისცემს. შეგიძლიათ სპეციალური დამცავი საკეტები დაამაგროთ, რომ ფანჯარა მხოლოდ რამდენიმე სანტიმეტრზე იღებოდეს.

კარებში რომ თითები არ მიეჭყლიტოს, ამისთვისაც არსებობს კარის შემზღუდავი სამაგრები. ისინი კარს ბოლომდე დაკეტვის შანსს არ უტოვებს. შესაბამისად, თქვენი პატარის თითებიც დაცული იქნება და ვერც ოთახში მარტოდ ჩაკეტვას მოახერხებს.

კარადებსა და ყუთებში რომ არ იძრომიალოს და საშიშ ნივთებში არ იბუჯურაოს, სპეციალური საკეტებით ამ პრობლემასაც მოაგვარებთ. მართალია, მალევე ისწავლის დამოუკიდებლად გაღებას, მაგრამ ამასობაში უფრო დაბრძენდება-კიდეც და სხვა ინტერესები გაუჩნდება.

ყველაფერი, რაც ვარდება, პოტენციური მტერია

ყურადღება მიაქციეთ ავეჯს! ავეჯი მშვენიერი საფოფხიალო თავშესაქცევია. თუ არსებობს მისი გადმოყირავების, ან გადმოვარდნის საფრთხე, თუ ბავშვს შეუძლია აძვრეს და გადმოამხოს, ან გამოქაჩოს და ჩამოაგდოს, აუცილებლად მიამაგრეთ კედელზე! რასაკვირველია, შეგიძლიათ აუხსნათ და დაუსაბუთოთ, რომ ავეჯის ნჯღრევა და ზედ ცოცვა კარგი აზრი არაა, მაგრამ სიფრთხილეს თავი არ სტკივა. და არც ტანი...

ნუ დადებთ საშიშ და მძიმე ნივთებს ხელმისაწვდომ ადგილას. არ მისცეთ ბავშვს საშუალება, უთო, ლარნაკი, ან ქოთანი დაიცეს თავში. ქოთნები რაფებიდანაც რომ აიღოთ, არ იქნება ურიგო – ფანჯრის ქვეშ გამვლელებზეც ხომ უნდა ვიზრუნოთ.

შუშის დამცავი აპკი

ნაკლებად სავარაუდოა, ფანჯრებისა და კარების ნაწრთობი მინები და შუშის მაგიდის ტყვია და ტეხვაგამძლე ზედაპირები გქონდეთ. რომ იცოდეთ, არსებობს სპეციალური შუშის დამცავი აპკი – დააკრავ და თუ გატყდა, ათას ბასრ ნატეხად არ დაიმსხვრევა და არც ბავშვს ჩაესობა ანდერსენის „თოვლის დედოფალის“ გმირი კაისავით.

მხუთავი აირის დეტექტორი და სახანძრო უსაფრთხოება

სასიკვდილო საფრთხეებიდან განსაკუთრებით ხაზგასასმელია ხანძარი და მხუთავი აირის დაგროვება. პერიოდულად აუცილებლად შეამოწმებინეთ გაზის მოწყობილობები სპეციალისტს. ბუხრები დამცავი ბადეებით შემოსაზღვრეთ. თუ საშუალება გაქვთ, კვამლისა და მხუთავი აირის დეტექტორები დააყენეთ. გაზის გამათბობლის შეძენისას დარწმუნდით, რომ ნამდვილად ხარისხიანია და დამონტაჟებულია პროფესიონალის მიერ.

რომ შევაჯამოთ:

დიახ, ბავშვისთვის ყველაზე მნიშვნელოვანი ჩვენი ზრუნვა და ყურადღებაა, სითბო და სიყვარული.  უსაფრთხოებისთვის აუცილებელი მარტივი აღჭურვილობა თქვენს ყურადღებას ნამდვილად ვერ ჩაანაცვლებს, მაგრამ უსიამოვნო შემთხვევების შემცირებაში უსათუოდ დაგეხმარებათ. 

ნიდოზე რადიო ძიძები, ვიდეო მონიტორები, უსაფრთხოების ნივთები და სხვა საბავშვო აქსესუარები იხილეთ აქ